Milliy olimpiya qo‘mitasining majlislar zalida O‘zbekiston otish sporti federatsiyasining navbatdan tashqari konferensiyasi o‘tkazildi.

Tadbirda mudofaa vaziri general-mayor Shuhrat Xolmuhamedov, sport vaziri Adham Ikromov, Milliy olimpiya qo‘mitasi raisining birinchi o‘rinbosari Otabek Umarov, qo‘mita bosh kotibi Oybek Qosimov, federatsiya vakillari hamda murabbiylar va sportchilar ishtirok etdilar.

Kun tartibi doirasida federatsiyaning amalga oshirgan ishlari bo‘yicha hisobot tinglandi, shundan so‘ng Xolmuhamedovning nomzodi otish sporti federatsiyasi raisi lavozimiga taklif etildi. Uning nomzodi ishtirokchilar tomonidan bir ovozdan ma’qullandi.

Yangi saylangan rais barcha ishtirokchilarga ishonch bildirganlaridan minnatdorchilik izhor etib, otish sportini yanada rivojlantirish uchun barcha kuch va imkoniyatlarini safarbar etishga va’da berdi. U hududlarda zamonaviy infratuzilmaga ega bo‘lgan otish majmualarini qurish, ularni zarur uskunalar bilan jihozlash, shuningdek, “Mergan kubogi” va yoshlar o‘rtasidagi birinchilik kabi yangi musobaqalarni tashkil etish rejalari haqida so‘zlab berdi.

Federatsiya faoliyatida asosiy e’tibor 2028-yilda Los-Anjelesda bo‘lib o‘tadigan Olimpiya o‘yinlariga litsenziyalar olish va ushbu musobaqalarda sovrinli o‘rinlarni egallash uchun sportchilarni tayyorlashga qaratiladi.