Uchrashuvlar va muzokaralar O‘zbekiston investitsiyalar, sanoat va savdo vaziri Laziz Qudratov hamda Misr rejalashtirish, iqtisodiy rivojlanish va xalqaro hamkorlik vaziri Raniya al-Mashat o‘rtasidagi muloqot bilan boshlandi.

Tomonlar ikki davlat o‘rtasidagi munosabatlarning hozirgi holati va istiqbollarini ko‘rib chiqdilar. O‘zaro savdo, investitsiyalarni jalb qilish va qo‘shma sanoat faoliyati masalalariga alohida e’tibor qaratildi. So‘nggi bir yil ichida tovar aylanmasining sezilarli darajada o‘sganligi, jumladan, ip-kalava, neft mahsulotlari, kimyoviy mahsulotlar va qishloq xo‘jaligi mahsulotlari eksportining ko‘payganligi ta’kidlandi.

O‘zbekiston hududida Misr sarmoyasi ishtirokidagi 15 ta korxona faoliyat yuritmoqda, Misr kompaniyalari esa suv ta’minoti tizimlarini modernizatsiya qilish, oziq-ovqat mahsulotlari ishlab chiqarish va geologik qidiruv loyihalarida ishtirok etmoqda.

Tadbirlar dasturi Hukumatlararo komissiya majlisi bilan davom etdi, unda joriy loyihalarni amalga oshirish batafsil muhokama qilindi. Ish bosqichlari tahlil etilib, kelishuvlarni tezroq bajarish uchun choralar ishlab chiqildi.

Uchrashuvning ishbilarmonlik qismi 150 dan ortiq kompaniya vakillari qatnashgan biznes-forum bilan yakunlandi. O‘zbekiston raqamli texnologiyalar, farmatsevtika, qishloq xo‘jaligi va turizm sohalaridagi investitsion imkoniyatlarini taqdim etdi. Shuningdek, B2B va B2G formatidagi uchrashuvlar tashkil etildi, unda tadbirkorlar istiqbolli loyihalarni muhokama qildilar.

Natijada bir qator bitimlar, jumladan, atrof-muhitni muhofaza qilish, ta’lim, farmatsevtika va madaniy almashinuv sohalarida hamkorlik to‘g‘risidagi hujjatlar imzolandi.