Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm qo‘mitasi majlisida ‘Manfaatlar to‘qnashuvi to‘g‘risida‘gi qonunni amalga oshirish bilan bog‘liq vazifalar bajarilishi ko‘rib chiqildi.

Ta’kidlanishicha, O‘zbekistonda korrupsiyaga qarshi kurashishning huquqiy asoslari yaratilgan bo‘lib, davlat xizmatlarini raqamlashtirish inson omilini kamaytirishga xizmat qilgan. Joriy yilda qabul qilingan ‘Manfaatlar to‘qnashuvi to‘g‘risida»gi Qonun korrupsiyaviy xavf-xatarlarning oldini olishda muhim mexanizmlarni ta’minlamoqda.

Majlisda Tashqi ishlar vazirligi, Investitsiyalar, sanoat va savdo vazirligi hamda Turizm qo‘mitasining hisobotlari tinglandi. Ma’lum bo‘lishicha, ichki korrupsiyaga qarshi kurashish tizimlari yetarlicha samarali ishlamayapti, bu esa qonunchilikni buzish xavfini yuzaga keltirmoqda.

Senatorlar bunday muammolarga tezkor munosabat bildirish zarurligini ta’kidladilar. Korrupsiyaga qarshi kurashish, qonun buzilishlarini bartaraf etish va qonun ijrosi ustidan nazoratni takomillashtirish bo‘yicha ishlarni yanada faollashtirish to‘g‘risida qaror qabul qilindi. Vazirlik va idoralarga shaffoflikni ta’minlash va huquqbuzarliklarning oldini olish choralarini kuchaytirish topshirig‘i berildi.