Xorazm viloyati Hazorasp tumanida yashovchi fuqaro ijtimoiy tarmoqlar orqali O‘zbekiston Qizil kitobiga kiritilgan noyob dasht miqqiyini sotishga urinayotganda qo‘lga olindi.

Dasht miqqiyi — muhofaza qilinadigan va IUCN Qizil ro‘yxatida “zaiflikka yaqin” maqomiga ega bo‘lgan ko‘chmanchi tur hisoblanadi. Bu tur G‘arbiy Tyan-Shan, Pomir-Oloy, Qizilqum qoldiq tog‘larida, shuningdek, Amudaryo va Zarafshon daryolari vodiylarida tarqalgan.

Qonunbuzarga nisbatan O‘zbekiston Respublikasi Ma’muriy javobgarlik to‘g‘risidagi kodeksining 92-moddasi bo‘yicha ma’muriy bayonnoma tuzilib, unga bazaviy hisoblash miqdorining 5 baravari — 1 million 875 ming so‘m miqdorida jarima solindi.

Olib qo‘yilgan qush sog‘lig‘ini tekshirish uchun Xorazm milliy tabiat bog‘iga topshirildi. Davolash va reabilitatsiyadan so‘ng dasht miqqiyini yovvoyi tabiatga qaytarish rejalashtirilmoqda.