Britaniya muzeyida Jaloliddin Manguberdi nomi bilan bog‘liq “Yada” toshi 1990.06.12.1 raqami ostida saqlanmoqda. Islom madaniyatining ushbu noyob ashyosi Eron hududidan topilgan va kimoshdi savdosida sotib olingan.

O‘ymakorlik va naqsh o‘yish texnikasi yordamida ishlangan toshning o‘lchamlari quyidagicha: balandligi — 29 sm, eni — 50 sm, qalinligi — 32 sm, og‘irligi — 42,5 kg. Mutaxassislar uni milodiy 1230-1231-yillarga oid deb hisoblaydilar.

Eksponat tavsifida Jaloliddin Xorazmshoh hayotining so‘nggi yillarida Sharqiy Turkiya, Shimoli-g‘arbiy Eron va Ozarbayjonda amalga oshirgan harbiy yurishlari bilan bog‘liqligi qayd etilgan.

“Yada” toshi Mirzo Ulug‘bekning “To‘rt ulus tarixi” asarida ham tilga olingan. Ushbu asarga ko‘ra, turklar bunday toshlardan yovuz niyatlardan himoyalanish uchun fol ochishda foydalanganlar.