Uzum texnologiya kompaniyasi 2024-yil natijalarini yakunladi. Mart oyida brend 1 milliard dollardan ortiq bozor qiymati bilan tarixga kirdi.

Bugungi kunda yurtimiz aholisining har uchinchisi kompaniya xizmatlaridan foydalanmoqda, bu esa Uzumga bo‘lgan yuqori ishonch darajasini ko‘rsatadi.

Yil mobaynida Uzum Market platformasi orqali 253 ta aholi punktiga 19 milliondan ortiq buyurtma yetkazib berildi. 12 ming tadbirkorning mahsulotlari taqdim etilgan ushbu maydonda buyurtmalarning 58 foizi bo‘lib-bo‘lib to‘lanadi.

Kompaniya Markaziy Osiyodagi eng yirik — 112 ming kvadrat metr maydonli omborxonani ochdi va o‘sib borayotgan talabni logistik jihatdan ta’minladi.

Yil davomida foydalanuvchilar sonini to‘rt barobarga ko‘paytirgan Uzum Tezkor tez yetkazib berish xizmati endi mamlakatning 17 ta shahrini qamrab olgan. Tezkor orqali buyurtmalarning 30 foizidan ko‘prog‘i kompaniyaning fintech xizmatlari yordamida to‘lanmoqda.

Uzum Bank 700 mingdan ortiq karta chiqardi, berilgan mikroqarzlar soni esa 1 milliondan oshdi. Muddatli to‘lov taqdim etuvchi Uzum Nasiya xizmati faol foydalanuvchilar sonini uch barobarga ko‘paytirdi.