Xalqaro shaxmat federatsiyasi (FIDE) chess.com platformasida 2024-yilda eng katta miqdordagi sovrin pullarini qo‘lga kiritgan shaxmatchilar ro‘yxatini e’lon qildi.
Ro‘yxat yetakchisi hindistonlik 2024-yil klassik shaxmat bo‘yicha jahon chempioni Gukesh Dommaraju bo‘lib, u 1 577 842 dollar daromad qilgan. Ikkinchi o‘rinda xitoylik grossmeyster Din Lijen turibdi, u 1 183 600 dollar ishlab topgan. Uchinchi o‘rinni norvegiyalik Magnus Karlsen 639 369 dollar bilan egallagan.
O‘zbekistonlik Nodirbek Abdusattorov 132 981 dollar ishlab topib, 12-o‘rinni egalladi. U bu natijaga bir yil davomida 12 ta nufuzli turnirda qatnashgani tufayli erishdi.
Abdusattorov 2025-yil boshida yirik shaxmat musobaqalarida ishtirokini davom ettiradi. 17-yanvar kuni u Niderlandiyaning Veyk-an-Zee shahrida o‘tkaziladigan “Tata Steel Chess-2025” turnirida qatnashadi.