O‘zbekistonda o‘zini o‘zi band qilgan fuqarolarga yengil avtomobillarda yo‘lovchi tashish bilan doimiy ravishda shug‘ullanish imkoniyati berilishi rejalashtirilmoqda. Bu haqda 11 yanvar kuni Prezident Shavkat Mirziyoyev boshchiligida o‘tkazilgan transport masalalariga bag‘ishlangan yig‘ilish yakunida ma’lum bo‘ldi.

Yo‘lovchi tashish 2022-yil sentyabr oyidayoq, har yili litsenziya rasmiylashtirish sharti bilan, o‘zini o‘zi band qilganlar uchun ruxsat etilgan faoliyat turlari ro‘yxatiga kiritilgan edi. Dastlab yangi ish tartibi 2024-yil oxirigacha amal qilishi belgilangan edi.

Biroq dekabr oyida Vazirlar Mahkamasi Transport vazirligi hamda Iqtisodiyot va moliya vazirligiga amaldagi tartibning amal qilish muddatini uzaytirish uchun me’yoriy-huquqiy hujjat loyihasini tayyorlashni topshirdi. Yangi tartib tasdiqlangunga qadar avvalgi tartibning amal qilishi vaqtincha uzaytirildi.

Ushbu tashabbus joriy etilganidan buyon qonuniylashtirilgan xususiy taksi haydovchilarining soni olti barobar ko‘payib, 457 ming nafarga yetdi. Endi mavjud tartibni doimiy asosda mustahkamlashga qaror qilindi, bu esa xususiy yo‘lovchi tashish xizmatlarini qonuniylashtirish jarayonini yanada rag‘batlantirishi kutilmoqda.