Ostonada “Yo‘lovchi tashish” AJ va “O‘ztemiryo‘lyo‘lovchi” vakillari o‘rtasidagi ishchi uchrashuvda O‘zbekiston va Qozog‘iston o‘rtasidagi yo‘lovchi tashuvlarini rivojlantirish masalalari muhokama qilindi. Muzokaralar yakunida yangi sayyohlik poyezdlarini ishga tushirish to‘g‘risida kelishuv imzolandi, shuningdek, qo‘shma loyihalarni amalga oshirish uchun ishchi guruh tuzildi.

Asosiy yo‘nalishlardan biri mamlakatlar o‘rtasidagi sayyohlik aloqalarini mustahkamlashda muhim qadam sifatida qaralayotgan “Ostona — Samarqand” yo‘nalishi bo‘ladi.

Hamkorlik doirasida “Jibek jo‘li” sayyohlik poyezdi ishga tushirildi, shuningdek, yo‘lovchilar uchun yanada qulayroq bo‘lishi maqsadida 2-sonli “Olmaota — Toshkent” poyezdining qatnov jadvali qayta ko‘rib chiqildi.

O‘tgan yili “Olmaota — Toshkent” poyezdi 72 mingdan ortiq yo‘lovchi tashigani ikki mamlakat o‘rtasidagi temir yo‘l yo‘nalishlariga qiziqish yuqori ekanligini ko‘rsatmoqda. Yo‘nalishning uzunligi 988 kilometrni tashkil etadi.