O‘zbekiston Xalq demokratik partiyasining Qoraqalpog‘iston Respublikasi Jo‘qorg‘i Kengesidagi fraksiyasi yangi tug‘ilgan chaqaloqlar uchun bolalar omonatini joriy etish taklifini ilgari surdi. Mazkur tashabbus oilalarni ijtimoiy qo‘llab-quvvatlashni kuchaytirish va bolalar kelajagiga uzoq muddatli sarmoya kiritishga qaratilgan.

Jo‘qorg‘i Kenges raisining o‘rinbosari Rustam Saparboyev tomonidan ishlab chiqilgan loyiha fraksiya yig‘ilishida muhokama qilindi. Omonatda to‘plangan mablag‘lardan foydalanish imkoniyati bola 18 yoshga to‘lgandan so‘ng berilishi ko‘zda tutilgan.

Ushbu omonatga nafaqat ota-onalar, balki vasiylar yoki homiylar ham o‘z hissalarini qo‘shishlari mumkin. To‘plangan mablag‘larni ta’lim uchun to‘lovlar, uy-joy masalalarini hal etish yoki boshqa qonuniy ehtiyojlarga yo‘naltirish imkoniyati mavjud bo‘ladi.

Tashabbus mualliflari ishonch bildiradilarki, bolalar omonatlari dasturi fuqarolarning moliyaviy savodxonligini oshiradi, jamg‘arma madaniyatini shakllantiradi va davlat yordamiga qaramlikni kamaytiradi.

Bundan tashqari, loyihani amalga oshirish uzoq muddatli ijtimoiy afzalliklarni nazarda tutadi. Bu byudjetga tushayotgan yukni kamaytirish va O‘zbekistonning ijtimoiy davlat sifatidagi obro‘sini mustahkamlashga xizmat qiladi. Shuningdek, tashabbus fuqarolarning ota-onalarini qo‘llab-quvvatlash bo‘yicha majburiyatlarini bajarish imkoniyatlarini ham o‘z ichiga oladi.