2024-yilda O‘zbekiston Rossiya va Qirg‘iziston bilan bir qatorda Xitoydan ishlatilgan avtomobillarning eng yirik xaridorlari uchligiga kirdi. Ushbu uch davlat eksport qilingan 400 ming avtomobilning qariyb 50 foizini sotib olganini Nikkei nashri xabar qilmoqda.

O‘tgan yili Xitoydan ishlatilgan avtomobillar eksporti rekord darajada 45 foizga o‘sdi. Bu 2023-yilda Xitoy yangi avtomobillar eksporti bo‘yicha Yaponiyani ortda qoldirib, jahonda birinchi o‘rinni egallagan sharoitda e’tiborga loyiq ko‘rsatkich bo‘ldi. Yil davomida Xitoy chet ellarga 4,91 million yangi avtomobil yetkazib berdi — bu 2022-yilga nisbatan 57,9 foiz ko‘pdir.

2023-yilning 11 oyi ma’lumotlariga ko‘ra, O‘zbekiston 1,18 milliard dollar qiymatidagi 68,6 mingta avtomobil sotib olgan. Ularning 55,7 mingtasi Xitoyga, 11,2 mingtasi Janubiy Koreyaga to‘g‘ri kelgan, 633 ta avtomobil esa AQShdan import qilingan.