O‘zbekiston muhim minerallar va noyob yer elementlarining jahon bozoridagi asosiy ishtirokchilaridan biriga aylanib bormoqda, bu esa yirik xalqaro o‘yinchilarning e’tiborini tortmoqda. Geosiyosiy vaziyat keskinlashib borayotgan sharoitda Vashington strategik resurslar yetkazib berishni diversifikatsiya qilish maqsadida Toshkent bilan hamkorlikni kuchaytirishga intilmoqda.

2024-yil sentyabrda AQSH elchisi Jonatan Xenik va O‘zbekiston geologiya vaziri o‘rinbosari Omonullo Nasriddinxo‘jayev o‘rtasida o‘zaro anglashuv memorandumining imzolanishi muhim qadamlardan biri bo‘ldi. Mazkur hujjat foydali qazilmalarni qazib olish va gaz infratuzilmasini modernizatsiya qilish sohasidagi hamkorlikni rivojlantirishga qaratilgan.

Bundan oldin, 2024-yil fevralda muhim minerallar bo‘yicha C5+1 formatidagi birinchi muloqotda Markaziy Osiyoning xalqaro bozorlarga integratsiyalashuvi va mintaqaning ekologik toza texnologiyalarga o‘tishi masalalari muhokama qilingan edi.

O‘zbekiston uran, reniy va tellur kabi nodir elementlarni ishlab chiqaruvchi dunyodagi eng yirik o‘nta davlat qatoriga kiradi, shuningdek, mis, molibden, germaniy va kremniyning sezilarli zaxiralariga ega. 2023-yilda mamlakatdagi geologiya-qidiruv bozori hajmi 11 milliard dollarga yetdi va yangi dastur doirasida noyob yer elementlarini qazib olishni rivojlantirish uchun 500 million dollar yo‘naltirish rejalashtirilmoqda.