Кечээ Тажикстандын борборунда Көз карандысыз Мамлекеттер Шериктештигине (КМШ) мүчө мамлекеттердин миграциялык органдардын жетекчилеринин кеңешинин XXVIII жыйыны өттү.

Иш-чарага КМШга мүчө-өлкөлөрдүн ыйгарым укуктуу миграциялык органдарынын жетекчилери, анын ичинде Азербайжан, Беларусь, Кыргызстан, Тажикстан, Россия жана Өзбекстан сыяктуу мамлекеттердин өкүлдөрү катышты. Жыйынга ошондой эле КМШнын Аткаруу комитетинин, мүчө мамлекеттердин Парламенттер аралык ассамблеясынын, Антитеррордук борбордун жана Профсоюздардын жалпы конфедерациясынын өкүлдөрү катышты.

Жыйында аймактагы миграцияга байланыштуу орчундуу маселелер талкууланды. Тажикстандын эмгек, миграция жана иш менен камсыз кылуу министри Гүлнора Хасанзода белгилегендей, күн тартибинде миграциялык кырдаал, мыйзамдардагы өзгөртүүлөр, мыйзамсыз миграция менен күрөшүү, моделдик мыйзамдар жана процесстерди санариптештирүү темалары бар.

Жолугушуунун катышуучулары мыйзамсыз миграцияга каршы күрөшүү программасын ишке ашыруу, реадмиссия боюнча эл аралык келишимдерди түзүү, миграция кызматынын ишинде “бирдиктүү терезе” принцибинин жана санариптештирүүнүн тажрыйбасын талкуулашты.

Жыйындын жыйынтыгында КМШга мүчө-мамлекеттердин миграциялык органдарынын башчыларынын кеңеши менен Антитеррордук борбордун ортосунда кызматташуу боюнча Меморандумга кол коюлуп, тиешелүү Протокол кабыл алынды. Кеңештин демилгеси менен миграция тармагындагы кызматташуунун келишимдик-укуктук базасын түзүү иштери уланууда.

Сүрөт: НИАТ “Ховар”