Душанбе, 23 декабр, 2025 — АИ «Корвон Иттилоот». Рӯзи 20 декабр дар меҳмонхонаи Crowne Plaza Душанбе Конгресси навбатии Федератсияи футболи Тоҷикистон (ФФТ) баргузор шуд. Дар кори Конгресс намояндагони ФИФА ва Конфедератсияи футболи Осиё ширкат доштанд.
Дар ҷаласа масъалаҳои асосӣ чунин буданд: тасдиқи протоколи ҷаласаи қаблӣ аз 14 декабри 2024, гузориш оид ба фаъолияти ФФТ дар соли 2025, натиҷаҳои молиявии соли 2024, тасдиқи буҷети ФФТ барои соли 2026 ва гузориши аудитор оид ба ҳисоботи молиявии соли 2024. Дар доираи Конгресс соли 2026 Соли инфрасохтории футболи Тоҷикистон эълон гардид.
Баъд аз Конгресс дар ҳамон меҳмонхона ҷаласаи Кумитаи иҷроияи ФФТ баргузор шуд, ки дар он натиҷаҳои мавсими 2025 ҷамъбаст ва самтҳои асосии кор барои мавсими 2026 муайян гардиданд.
Ноиби президенти ФФТ Сайвалӣ Дониёрзода гузориш дод, ки дар он натиҷаҳои мулоқоти Президенти ФФТ Рустам Эмомалӣ бо намояндагони ҷомеаи футбол, пешрафтҳо ва лоиҳаҳои амалӣ иброз шудааст.
Членони Кумитаи иҷроия тақвими Лигаи олӣ барои мавсими 2026-ро тасдиқ карданд: мавсими нав 6 март бо иштироки 12 даста оғоз меёбад. Формати нав барои бозигарони хориҷӣ: ҳар як клуб метавонад то 7 легионерро ба дархост дохил кунад ва ҳамзамон то 5 нафарро ба майдон барорад.
Суперҷоми Тоҷикистон-2026 23 май дар Варзишгоҳи марказии Ҳисор байни қаҳрамон «Истиқлол» ва барандаи Ҷоми «Регар-ТадАЗ» баргузор мешавад. Формати Ҷоми кишвар низ барои мавсими 2026 тасдиқ шуд: чорякниҳоӣ ва нимниҳоӣ — дар ду бозӣ, финал — дар Варзишгоҳи «Вахш-Арена»-и Бохтар.
Аз мавсими нав ҳар як клуб бояд як бозигари ҷавони соли таваллудаш 2008 ё ҷавонтарро ба ҳайати асосӣ дохил кунад. Аз соли 2027 клубҳои Лигаи олӣ бояд дастаҳои занона дошта бошанд; аз соли 2026 ин талабот ҳамчун лоиҳаи пилотӣ санҷида мешавад.
Ба рушди футзал ва маркетинги клубҳо таваҷҷӯҳ карда шуд: тавсия шуд ранги ягонаи либосҳо муайян ва гурӯҳҳои футзал дар мактабҳои махсуси футбол ташкил шаванд. Кумитаи иҷроия инчунин рӯйхати беҳтарин бозигарон ва мураббиёни мавсими 2025-ро тасдиқ намуд.
АКС: Федератсияи футболи Тоҷикистон