Huawei Oʻzbekistonlik talabalarni oʻqitish bilan shugʻullanadi

O‘zbekiston Respublikasi raqamli texnologiyalar vaziri o‘rinbosari Rustam Karimjonov Huawei kompaniyasining Yaqin Sharq va Markaziy Osiyo mintaqasi bo‘yicha vitse-prezidenti janob Van Shunli boshchiligidagi delegatsiya vakillari bilan uchrashdi.



 Uchrashuvda raqamli taʼlimni rivojlantirish, Huawei kompaniyasining taʼlim dasturlari va loyihalarida erishilgan yutuqlar, shuningdek, Oʻzbekistonda talabalar uchun ilgʻor texnologiyalarni oʻrganish imkoniyatlarini kengaytirish boʻyicha hamkorlik masalalari muhokama qilindi.


R.Karimjonov kompaniyaning “Seeds for the Future” va “Tech4Good” kabi loyihalar orqali raqamlashtirish sohasida O‘zbekiston yoshlarining salohiyati va imkoniyatlarini oshirishga qo‘shgan hissasini qayd etdi.

O‘zbekistonda raqamlashtirish sohasi jadal rivojlanib borayotgani va malakali kadrlarga bo‘lgan ehtiyoj ortib borayotganini hisobga olib, tomonlar Huawei loyihalari asosidagi dasturlarni amalga oshirishda hamkorlikni davom ettirishga kelishib oldilar.