Душанбе, 04 сентябр, — АИ «Корвон Иттилоот». Дар доираи сафари расмии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Ҷумҳурии Мардумии Чин дар шаҳри Пекин бастаи ҳашт санади нави ҳамкорӣ ба имзо расид, ки ба таҳкими минбаъдаи муносибатҳои дуҷониба нигаронида шудаанд.
Ин санадҳо соҳаҳои гуногун — аз нақлиёт ва саноати кӯҳкорӣ то иқтисоди рақамӣ, муҳити зист, омори давлатӣ ва фарҳангро фаро мегиранд.
Санадҳои асосӣ:
- Созишнома байни Ҳукуматҳои Тоҷикистон ва Чин оид ба муносиботи байналмилалии автомобилӣ — рушди робитаҳои нақлиётӣ ва осон кардани ҳамлу нақли автомобилӣ.
- Ёддошти тафоҳум байни Вазоратҳои корҳои хориҷии Тоҷикистон ва Чин оид ба Ташаббуси амнияти глобалӣ — таҳкими муколамаи сиёсӣ ва ҳамкорӣ дар соҳаи амнияти байналмилалӣ.
- Ёддошти тафоҳум байни Вазорати рушди иқтисод ва савдои ҶТ ва Агентии чинӣ оид ба ҳамкории байналмилалӣ бо ҳадафи рушд — тавсеаи ҳамкорӣ дар соҳаи рушди захираҳои инсонӣ.
- Ёддошти тафоҳум байни Вазорати саноат ва технологияҳои нави ҶТ ва Вазорати захираҳои табиии Чин — ҳамкорӣ дар бахши саноати кӯҳкорӣ ва истифодаи технологияҳои муосир.
- Ёддошти тафоҳум оид ба иқтисоди рақамӣ байни Агентии инноватсия ва технологияҳои рақамӣ назди Президенти ҶТ ва Идораи давлатии иттилооти Чин — густариши ҳамкорӣ дар бахши IT ва додаҳои бузург.
- Ёддошти тафоҳум байни Кумитаи ҳифзи муҳити зист назди Ҳукумати ҶТ ва Кумитаи давлатии рушд ва ислоҳоти Чин — ҳамкорӣ дар масъалаҳои экология ва рушди устувор.
- Ёддошти тафоҳум оид ба ҳамкории оморӣ байни Агентии омори назди Президенти ҶТ ва Бюрои миллии омори Чин — мубодилаи таҷриба ва ҳамоҳангсозии маълумоти оморӣ.
- Ёддошти тафоҳум байни Консерваторияи миллии Тоҷикистон ба номи Т. Сатторов ва Консерваторияи шаҳри Тянҷини Чин — таҳкими робитаҳои фарҳангӣ ва мубодилаи академӣ.
Имзои ин санадҳо далели рушди пайдарпайи муносибатҳои Тоҷикистон ва Чин буда, хусусияти стратегии ҳамкориҳои ду кишварро таъкид мекунад. Онҳо заминаи нав барои амалисозии лоиҳаҳои муштарак гузошта, робитаҳои иқтисодӣ ва фарҳангиро таҳким мебахшанд ва ба рушди захираҳои инсонӣ ва навсозии технологӣ мусоидат менамоянд.
АКС: Хадамот матбуоти Президенти Ҷумҳурии Тоҷикистон