2024 жылғы 12 шілдеде Қазақстан Президенті Қасымжомарт Тоқаев Біріккен Араб Әмірліктерінің республикадағы елшісі Мұхаммед Саид Мұхаммед әл-Арикимен кездесу өткізді.

Мемлекет басшысы Астанада өткен Шанхай Ынтымақтастық Ұйымының саммитіне қатысқаны үшін БАӘ өкілдеріне алғысын білдірді.

Қазақстан Президенті баспасөз қызметінің мәліметінше, тараптар бұрын жоғары деңгейде қол жеткізілген сауда-экономикалық және инвестициялық салалардағы уағдаластықтарды іске асыруды талқылады. Сондай-ақ, Қазақстан Республикасы мен БАӘ арасындағы стратегиялық инвестициялық жобалар туралы бірлескен декларация шеңберінде жұмысты жалғастыру қажеттігі туралы мәлімделді.

Сонымен қатар, кездесуге қатысушылар энергетика және көлік-логистика салаларында, ақпараттық технологиялар және жасанды интеллект салаларында ынтымақтастық перспективаларын қарастырды. 

2023 жылдың мамыр айының соңында Қазақстан Президенті Әбу-Даби әмірлігінің басқарушы отбасының аға өкілі шейх Сурур бен Мұхаммед Әл Нахаянмен кездесті.

Кездесуде екіжақты ынтымақтастықты нығайту мәселелері талқыланды.

Келіссөздер соңында Қасым-Жомарт Тоқаев екіжақты қатынастарды нығайтуға және дамытуға қосқан зор үлесі үшін шейхке I дәрежелі «Достық» орденін табыс етті.

«Жыл басында Әмірліктерге сапар мен ел басшылығымен келіссөздер туралы үлкен қуанышпен еске аламын. Әрине, қол жеткізілген уағдаластықтар біздің халықтарымыздың игілігі үшін қызмет ететін болады. Қазақстан үшін Біріккен Араб Әмірліктері – ислам әлеміндегі сенімді және негізгі стратегиялық әріптес, тәуелсіздіктің алғашқы жылдарынан бері бізді қолдап келе жатқан бауырлас ел. Біздің халық мұны әрқашан бағалайды. Сондықтан БАӘ-нің еліміздің дамуына қосқан үлесін біз достық пен тығыз ынтымақтастықтың жарқын көрінісі ретінде қарастырамыз. Мүмкіндікті пайдалана отырып, ел басшылығына ризашылығымды білдіріп, БАӘ Президенті шейх Мұхаммед бен Заид Әл Нахаянға ең жылы тілектерімді жеткізгім келеді»,-деп атап өтті сол кезде Қасым-Жомарт Тоқаев.

Фото: Қазақстан Республикасы Президентінің баспасөз қызметі