Қазақстанның Сауд Арабиясындағы елшісі Мадияр Менилбеков Медина провинциясының губернаторы Ханзада Салман Бен Сұлтан бен Абделазиз және сауда палатасының төрағасы Мазен бен Ибрахим Ражабпен кездесті. Кездесулер барысында Қазақстанның өңірлері мен ислам әлемінің маңызды рухани орталығы-Медина провинциясы арасындағы ынтымақтастықты дамыту жолдары талқыланды.

Мадияр Менилбеков екі елдің дінаралық диалогты дамытуға қосқан үлесін атап өтіп, конфессияаралық және этносаралық келісімді қолдаудағы Қазақстанның тәжірибесімен бөлісті. Сондай-ақ, ол Қазақстандағы ағымдағы саяси және экономикалық реформалар туралы айтты.

Экономикалық аспектте инвестициялық және сауда байланыстарын нығайту, сондай-ақ екі мемлекеттің іскер топтарының сапарларымен алмасу талқыланды. Қазақстандық дипломат Медина провинциясынан кәсіпкерлерді 2024 жылғы 29 шілдеге Алматыда жоспарланған Қазақстан-Сауд Іскерлік кеңесінің үшінші отырысына шақырды.

Фото: ҚР СІМ