Алматы, 2025 жылғы 30 желтоқсан – Karavan Info ақпараттық агенттігі. Қазақстан Республикасының Жасанды интеллект және цифрлық даму министрлігі мен Freedom Lifestyle компаниясы Алматыда елдегі алғашқы пилотсыз дрон жеткізу қызметін іске қосу туралы меморандумға қол қойды. Пилоттық жоба 2026 жылдың қаңтарында басталады, деп хабарлады Цифрлық даму министрлігінің баспасөз қызметі.

Пилоттық жоба барысында дрондар қаланың екі нүктесінен 3 шақырымға дейінгі радиуста азық-түлік, күнделікті тауарлар мен дәрі-дәрмектерді жеткізеді. Әрбір дрон салмағы 10 келіге дейінгі жүктерді тасымалдай алады.

«Пилоттық жобалар бізге технологияларды нақты жағдайларда сынақтан өткізуге және қажетті реттеуші шешімдерді әзірлеуге мүмкіндік береді», — деді Цифрлық даму министрлігінің Цифрлық активтер жөніндегі комитетінің төрағасы Ғиззат Байтұрсынов.

Жоба кезең-кезеңімен әзірленеді: сынақтар 2026 жылдың қаңтарынан наурызына дейін өтеді, ал байланыс арналарының қауіпсіздігі мен тұрақтылығы расталған сайын дрондар санын көбейту жоспарлануда.

Фото : MCRIAP RK