Астана, 2025 жылғы 19 мамыр – «Караван Инфо» ақпараттық агенттігі.Қазақстан Республикасының Мәдениет және ақпарат министрі Аида Балаева ЮНИСЕФ-тің Еуропа және Орталық Азия бойынша аймақтық директоры Регина Де Доминисис ханыммен кездесу өткізді. Кездесу барысында тараптар Қазақстан мен БҰҰ Балалар қоры арасындағы елдегі балалар мен жастардың құқықтары мен әл-ауқатын қорғауды қамтамасыз етуге бағытталған ұзақ мерзімді және жемісті ынтымақтастықтың негізгі бағыттарын талқылады.

Диалог барысында Қазақстан мен ЮНИСЕФ арасындағы 20 жылдан астам табысты серіктестіктің нәтижелеріне ерекше назар аударылды. Қордың жастар ресурстық орталықтары желісін дамытудағы маңызды рөлі және оның өскелең ұрпақтың мүдделерін қорғауға бағытталған мемлекеттік саясатты қолдауға қосқан үлесі атап өтілді.

Министр Аида Балаева ЮНИСЕФ-ке республика бойынша олардың санын 200-ге дейін ұлғайту жоспарланып отырған Отбасын қолдау орталықтарын құру және дамыту үдерісінде көрсеткен сараптамалық және әдістемелік қолдауы үшін шынайы алғысын білдірді.

Сондай-ақ, балаларды ерте жастан дамыту және жауапты ата-ана институтын нығайту мәселелері бойынша бірлескен жұмыстарға, оның ішінде жалпыұлттық «Ата-аналар айлығын» өткізу және тиімді ведомствоаралық жұмыс тобын құруға баса назар аударылды.

Кездесу соңында тараптар барынша басым бағыттар бойынша ынтымақтастықты одан әрі нығайтуға өзара дайын екендіктерін білдірді.

Олардың қатарында балаларды әлеуметтік желілерде таралатын зиянды контенттен қорғау, жасөспірімдер арасында ерте ата-ана болуды болдырмау, волонтерлік қозғалысты белсенді дамыту және Қазақстандағы балалар мен жастардың әл-ауқатына қатысты басқа да әлеуметтік маңызды мәселелерді шешу мәселелері бар.

Сондай-ақ министр Аида Балаева ЮНИСЕФ апталығын Қазақстанда өткізу мүмкіндігін қарастыруды ұсынды.

Фото: ҚР Мәдениет және ақпарат министрлігінің баспасөз қызметі