Ақордада сегіз мемлекеттің төтенше және өкілетті елшілерінің Қазақстан Президентіне сенім грамоталарын тапсыру рәсімі өтті.

Сенім грамоталарын Норвегия Корольдігінің Елшісі Хелена Санд Андресен, Аргентина Республикасының Елшісі Энрике Игнасио Феррер Виейра, Гана Республикасының Елшісі Кома Стим Джеху Аппиа, Мали Республикасының Елшісі Сейду Камиссоко, Гамбия Республикасының Елшісі Алкали Фанка Контех, Бангладеш Халық Республикасының Елшісі Мухаммад Назрул Ислам, Шри-Ланка Демократиялық Социалистік Республикасының Елшісі Шобини Гунасекера және Босния және Герцеговина Елшісі Иван Орлич тапсырды.

Қасым-Жомарт Тоқаев дипломаттармен Қазақстанның әлеуметтік-экономикалық және саяси даму перспективалары туралы әңгімелесті.

« Сыртқы қиындықтарға қарамастан, біздің экономикамыз аймақтағы ең тұрақты және серпінді экономика болып қала береді. Дегенмен, біз жетістіктерімізге тоқтап қалмаймыз және экономикалық реформаларды дәйекті түрде жүзеге асыруды жалғастырамыз. 15 наурызда еліміз жаңа Конституцияны қабылдау бойынша бүкілхалықтық референдум өткізеді. Біз бұл құжатты азаматтардың қолдауына үміт артамыз, себебі бұл елдің одан әрі ілгерілеуіне бағытталған маңызды қадам болады. Біз жаңа Конституцияның ауқымды реформалар, демократияландыру және Қазақстанды жан-жақты жаңғырту үшін берік негіз қалап, елдің дамуы мен азаматтарымыздың әл-ауқатын жақсарту үшін жаңа мүмкіндіктер ашатынына үлкен үміт артамыз», — деді Президент .

Мемлекет басшысы Қазақстанның бейбіт сыртқы саясат жүргізетінін атап өтті. Ол қазіргі әлемдегі барлық қайшылықтар мен қақтығыстар тек бейбіт жолмен және дипломатиялық құралдармен шешілуі керек екенін мәлімдеді. Қасым-Жомарт Тоқаев Парсы шығанағы мемлекеттерімен ынтымақтастық білдіріп, қақтығыстардың тезірек шешілуіне үміт артты.

Соңында Мемлекет басшысы шетелдік дипломаттарға жауапты жұмыстарында табыс тіледі.

Дереккөз: ХАБАР Ақпарат агенттігі