Әл-Фараби атындағы Қазақ ұлттық университетінің Стратегиялық даму орталығының қызметкерлері Times Higher Education басылымының Лондондағы кеңсесінде тағылымдамадан өтті.

Тағылымдама барысында қызметкерлер халықаралық рейтинг механизмдері, деректерді талдаудың заманауи әдістері және университеттерді әлемдік білім беру және ғылыми кеңістікте ілгерілетудің стратегиялық бағыттары туралы білімдерін тереңдетті.

Әлемдік және пәндік рейтингтерді қалыптастыру әдіснамасын, негізгі көрсеткіштерді есептеу принциптерін және рейтинг саясатының тиімділігін арттыруға бағытталған практикалық құралдарды зерттеуге ерекше назар аударылды.

Times Higher Education өкілдері зерттеу қызметін бағалау, оқыту сапасы, халықаралық деңгей және университеттердің қоғамға әсері бойынша консультациялар өткізді. Сонымен қатар, пәндік рейтингтерге қатысу аспектілері және университеттердің БҰҰ Тұрақты даму мақсаттарына жетуге қосқан үлесін бағалайтын әсер рейтингісі талқыланды.

Алынған білім мен сарапшылардың ұсыныстары университеттің жетекші әлемдік рейтингтердегі орнын нығайтуға бағытталған стратегиялық құжаттар мен даму жоспарларын дайындау кезінде ескерілетін болады. Тағылымдама рейтинг саласындағы қызметкерлердің кәсіби құзыреттілігін арттырудағы маңызды қадам болды.

Дереккөз: Әл-Фараби атындағы Қазақ ұлттық университетінің баспасөз қызметі