Қазақстан, 27 маусым 2025 жыл – Караван Инфо ақпараттық агенттігі.Қазақ ұлттық хореография академиясы өнер және спорт саласындағы білім беру ұйымдары арасында 2025 жылға арналған жетекші университеттердің Ұлттық рейтингінде бірінші орынды иеленді. Бұл рейтинг жоғары білім саласындағы ең беделді көрсеткіштердің бірі болып саналады.

Рейтинг академиялық бедел, білім сапасы, ғылыми-зерттеу қызметі және еңбек нарығындағы түлектерге деген сұраныс сияқты негізгі критерийлерге негізделген.

Бұл Академия ұжымы мен оның студенттерінің қажырлы еңбегі мен кәсіби шеберлігінің нәтижесі. Соңғы жылдары Академия ұлттық деңгейде де, халықаралық деңгейде де бірқатар шығармашылық және ғылыми жобаларды сәтті жүзеге асырды. Заманауи білім беру бағдарламаларын енгізіп, көшбасшы мәртебесін сенімді түрде сақтап келеді.

Академия студенттері халықаралық беделді олимпиадаларда жоғары нәтижелерге қол жеткізіп, жүлделі орындарға ие болуда. Оқу орнына тек Қазақстаннан ғана емес, әлемнің түкпір-түкпірінен келген студенттер осында жоғары сапалы кәсіби білім алуда.

Студенттердің жан-жақты дамуы үшін барлық жағдай жасалған: хореография және өнер саласындағы әлемдік сарапшылармен тұрақты түрде шеберлік сабақтары өткізіліп тұрады, сонымен қатар жетекші шетелдік университеттердегі академиялық ұтқырлық бағдарламалары арқылы білім деңгейін көтеруге мүмкіндік беріледі.

Қазақстан Республикасының Президенті Қасым-Жомарт Тоқаевтың бастамасымен елімізде шығармашылық өнер саласы қарқынды дамып келеді. Осыған орай Қазақ ұлттық хореография академиясы «Шығармашылық өнер индустриясы» жаңа білім беру бағдарламасы бойынша 2025-2026 оқу жылына құжаттар қабылдау туралы хабарлайды. Бағдарлама аясында оқытуды осы саладағы жетекші отандық мамандар жүргізеді.

Академияның негізгі мақсаты – хореография, өнертану, өнер менеджменті және шығармашылық өнер индустриясы саласында жоғары білікті кадрлар даярлау, сондай-ақ ұлттық мәдениет пен өнердің дамуына тың серпін беруге қабілетті мамандардың жаңа буынын қалыптастыру.

Фото: gov.kz