Қызылорда, 9 шілде 2025 жыл – «Караван ақпарат» АА.Қызылордада тұрақты урбанизация, инклюзивті даму және ұлттық қалалық күн тәртібін қалыптастырудағы өңірлік қалалардың рөліне арналған Қазақстанның Ұлттық урбандық форумы өтті.

Форум барысында қатысушылар заманауи климаттық, экономикалық және әлеуметтік сын-қатерлер жағдайында қалаларды кешенді түрлендіру жолдарын талқылады. Сондай-ақ қолайлы және тұрақты қалалық ортаны құрудың озық тәжірибелері мен стратегиялық тәсілдерімен алмасу ұйымдастырылды.

Қазақстан Республикасы Индустрия және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков өзінің құттықтау сөзінде Қазақстан қаланы қайта құрудың жаңа кезеңіне аяқ басқанын атап өтті. Оның айтуынша, бүгінде қалалар тек экономикалық өсу нүктесіне ғана емес, сонымен қатар әлеуметтік әділеттілік, цифрлық шешімдер мен экологиялық тұрақтылық кеңістігіне айналуда.

«Бүгін біз тек тұрғын үй құрылысы мен инфрақұрылымды ғана емес, сонымен бірге адамның әл-ауқаты мен белсенді қатысуына негізделген тұтас қалалық бірегейлікті қалыптастыру туралы айтып отырмыз», — деп атап өтті Жүнісбеков.

Форумның негізгі тақырыбы аймақтардан бастап, кешенді қалалық трансформация болды. Ол Жаңа қалалық күн тәртібі мен БҰҰ Тұрақты даму мақсаттарына сәйкес инклюзивті және теңгерімді дамуға жәрдемдесуге бағытталған.

Қызылорда сияқты шағын қалалардың ел дамуына қосатын стратегиялық үлесіне ерекше назар аударылды. Тұрақты урбанизацияның негізі ретінде тұрғын үй, инфрақұрылым және климатқа төзімділік ерекше атап өтілді.

Фото:Қазақстан Республикасы Индустрия және құрылыс министрлігі