Кембридж, 15 мамыр, 2025 жыл – Караван ақпарат агенттігі.Қазақстан Республикасының Ғылым және жоғары білім министрі Саясат Нұрбек Америка Құрама Штаттарына сапары барысында Гарвард университетінің Дэвис орыс және Еуразиялық зерттеулер орталығымен маңызды келісімге келді. Кездесу нәтижесінде Қазақстан мен әлемнің жетекші университеттерінің бірі арасындағы академиялық және ғылыми салалардағы стратегиялық серіктестікті дамытуға бағытталған өзара түсіністік туралы меморандумға қол қойылды.

Қол қойылған меморандум аясында тараптар академиялық алмасуды ұйымдастыруды қамтитын бірлескен бастамаларды бастауға келісті. Бұған тарих, саясаттану, экономика және тұрақты даму сияқты негізгі салаларда стипендиялар мен ғылыми тағылымдамадан өту мүмкіндіктері кіреді. Сонымен қатар, қазақстандық ғалымдарға бірлескен ғылыми жобаларды жүргізу үшін Гарвард университетінің бай кітапханасы мен мұрағат қорына уақытша рұқсат беріледі.

Келіссөздер барысында Қазақстанның бірегей тарихи мұрасын сақтау және насихаттау мәселелеріне ерекше назар аударылды. Осыған орай, Гарвард университетінің Хоутон кітапханасымен бірлескен жобаны бастау келісілді, оның мақсаты – сирек кездесетін кітаптар мен құнды қолжазбалардың қазақстандық қорын мұқият каталогтау және кейіннен цифрландыру.

Фото: Қазақстан Республикасы Ғылым және жоғары білім министрлігі