Афины, 21 мамыр, 2025 жыл – Karavan Info ақпараттық агенттігі.Қазақстан Республикасының Афинадағы Елшілігінің ұйымдастыруымен Грекия Республикасына Қазақстанның көлік саласының делегациясы барды. Делегация құрамында Қазақстан Республикасы Көлік министрлігі Темір жол және су көлігі комитетінің, Ақтау халықаралық теңіз сауда портының, сондай-ақ бірқатар жетекші қазақстандық көлік-логистикалық, кеме қатынасы және инвестициялық компаниялардың өкілдері болды. Бұл сапар Қазақстан Республикасының Президенті Қасым-Жомарт Тоқаев пен Грекия Республикасының Премьер-Министрі Кириакос Мицотакис арасында 2024 жылғы қарашада Бакуде қол жеткізілген уағдаластықтардың жалғасы болды.

Сапардың негізгі тақырыбы «Орта дәліз» деп аталатын Транскаспий халықаралық көлік бағытының әлеуетін және оның Грекияның көлік және порт инфрақұрылымымен интеграциясын талқылау болды. Сондай-ақ, кадрларды бірлесіп даярлау мәселелері талқыланды. Грекия кәсіпорындар федерациясымен (SEV) бірлесіп ұйымдастырылған «Дөңгелек үстелде» қазақстандық тарап Каспий порттарын жаңғыртудың перспективалық жобаларын, сондай-ақ шетелдік инвестицияларды тарту шарттары мен тетіктерін таныстырды. Грекиялық серіктестер өз кезегінде бірлескен мультимодальды логистикалық қызметтерді құруға қызығушылық танытты.

Қазақстандық делегацияның басшысы, Қазақстан Республикасы Көлік министрлігі Темір жол және су көлігі комитеті төрағасының орынбасары Қасым Тілепов Транскаспий халықаралық бағытын дамыту Қазақстанның экспорттық бағыттарды әртараптандырудағы негізгі басымдықтарының бірі болып табылатынын атап өтті. Ол грек компанияларын порттық және логистикалық инфрақұрылымды жаңғыртуға белсенді қатысуға шақырып, инвесторлар үшін барынша қолайлы жағдай жасауға кепілдік берді. Оның айтуынша, бұл жобаларды жүзеге асыру өңірлік жеткізу тізбектерінің тұрақтылығын нығайтып, екіжақты саудаға да, Еуропа елдерімен кеңейтілген ынтымақтастыққа да жаңа серпін береді.

Қазақстан Республикасының Грекиядағы Елшісі Тимур Сұлтанғожин Қазақстан мен Грекия өз аймақтарындағы маңызды көлік-логистикалық хабтар бола отырып, бірлескен жобаларды жүзеге асыруға және екіжақты қарым-қатынастарды нығайтуға кең мүмкіндіктерге ие екенін атап өтті.

Фото:Қазақстан Республикасы Көлік министрлігі