Тбилиси, 16 мамыр, 2025 жыл – Karavan Info ақпараттық агенттігі.Тбилисиде Қазақстан мен Грузия Сыртқы істер министрліктері арасындағы кезекті консулдық консультациялар өтті, оған екі елдің құзырлы органдарының өкілдері қатысты. Қазақстандық делегацияны Қазақстан Республикасы Сыртқы істер министрлігі Консулдық қызмет департаменті директорының орынбасары Бауыржан Досманбетов, ал грузин делегациясын Грузия Сыртқы істер министрлігі Консулдық қызмет департаментінің директоры Георгий Табатадзе басқарды.

Кездесу барысында тараптар консулдық саладағы екіжақты ынтымақтастыққа қатысты кең ауқымды мәселелерді талқылады. Қазақстан мен Грузия азаматтарының құқықтары мен заңды мүдделерін қорғауды қамтамасыз етуге, қолданыстағы екіжақты және көпжақты шарттарды, сондай-ақ консулдық-құқықтық саладағы халықаралық конвенцияларды іске асыруға ерекше назар аударылды. Сонымен қатар, қылмыстық-құқықтық ынтымақтастық, азаматтарды экстрадициялау рәсімдері және екіжақты күн тәртібінің басқа да өзекті аспектілері талқыланды.

Қазақстандық тарап Қазақстан Республикасы азаматтарының Грузияға келген кезде оған кіруіне тыйым салу және кейіннен оларды депортациялау жағдайларының көбеюіне алаңдаушылық білдірді. Қазақстан азаматтарының басым көпшілігі Грузияға туристік мақсатпен баратыны және қабылдаушы елдің заңнамасын адал орындайтыны ерекше атап өтілді.

Өз кезегінде грузин тарапы ағымдағы жылдың мамыр айының басынан бері Грузияға кіруден бас тарту жағдайларының айтарлықтай азайғанын хабарлады және қазақстандық делегацияны бұл оң үрдіс алдағы уақытта да жалғасын табатынына сендірді. Сондай-ақ грузин өкілдері Қазақстан азаматтарының Грузияға келуі мен жайлы тұруы үшін барынша қолайлы жағдай жасауға дайын екендіктерін білдірді.

Фото:Қазақстан Республикасының СІМ