Астана, 2025 жылғы 19 мамыр – «Караван Инфо» ақпараттық агенттігі.Қазақстан Республикасы Сыртқы істер министрінің орынбасары Роман Василенко Ұлыбритания және Солтүстік Ирландия Біріккен Корольдігі Мемлекеттік хатшысының Қорғаныс жөніндегі орынбасары Лорд Вернон Кокермен кездесті.

Кездесу барысында тараптар Қазақстан мен Ұлыбритания арасындағы екіжақты ынтымақтастықтың негізгі аспектілерін, оның ішінде қауіпсіздік, қорғаныс және бітімгершілік сияқты маңызды салалардағы өзара іс-қимылды талқылады.

Роман Василенко британдық әріптесін Қазақстан Қарулы Күштері өкілдерінің Біріккен Ұлттар Ұйымының бітімгершілік миссияларына қатысуының құнды тәжірибесі туралы және осы саладағы тиімді жұмыс үшін әскери кадрларды даярлау саласындағы халықаралық серіктестермен жемісті ынтымақтастық туралы хабардар етті.

Қазақстан Республикасы Сыртқы істер министрінің орынбасары Қазақстан тарапының БҰҰ аясында халықаралық бейбітшілік пен тұрақтылықты нығайтуға одан әрі елеулі үлес қосуға мүдделілігін растады.

Кездесуде сонымен қатар өзекті көпжақты мәселелер мен өңірлік және жаһандық күн тәртібіндегі негізгі тақырыптар бойынша жан-жақты пікір алмасу болды.

Қазақстан мен Ұлыбритания өкілдері әртүрлі көпжақты алаңдарда халықаралық қауіпсіздік пен ынтымақтастық контекстіндегі өзара мүдделі мәселелердің кең ауқымын талқылады.

Фото: Қазақстан Республикасының СІМ