Куала-Лумпур, 2026 жылғы 2 наурыз – Karavan Info ақпараттық агенттігі . ҚР Сыртқы істер министрінің орынбасары Әлібек Бақаев Малайзия Сыртқы істер министрінің орынбасары Луканисман бин Аванг Саунимен келіссөздер жүргізді. Тараптар саяси өзара іс-қимылды күшейту және ынтымақтастықты кеңейту мәселелерін талқылады.
Әлібек Бақаев Қазақстанның Малайзияны аймақтағы негізгі серіктес ретінде қарастыратынын атап өтті. Дипломатиялық қарым-қатынастардың 34 жылдан астам уақытында екі ел арасында тұрақты және сындарлы саяси диалог орнады.
Тараптар парламентаралық байланыстарды дамыту, сауда-экономикалық және инвестициялық ынтымақтастықты кеңейту, білім беру, туризм және жоғары технологиялар саласындағы байланыстарды нығайту мәселелерін талқылады. Олар құқықтық базаны жетілдіруге өзара мүдделіліктерін растады.
БҰҰ мен Ислам ынтымақтастығы ұйымы аясындағы өзара іс-қимылға, соның ішінде тәсілдерді үйлестіруге және бастамаларды өзара қолдауға ерекше назар аударылды.
Қазақстан малайзиялық серіктестерін Азиядағы өзара іс-қимыл және сенім шаралары жөніндегі кеңестің (АӨСШК) қызметі туралы хабардар етіп, аймақтық мемлекеттердің қатысуын кеңейтуге мүдделілік білдірді.
Тараптар Қазақстан-Малайзия ынтымақтастығын дәйекті түрде дамытуға және тұрақты байланыстарды жалғастыруға деген міндеттемелерін растады.
Фото : Қазақстан Республикасы Сыртқы істер министрлігі