Ұлан-Батырда Қазақстан Президенті Қасым-Жомарт Тоқаевтың Моңғолияға мемлекеттік сапарына орайластырылған Қазақстан-Моңғол Іскерлік кеңесінің алғашқы отырысы өтті. Іс-шара цифрландыру саласындағы ынтымақтастық перспективаларын талқылау үшін екі елдің бизнес және мемлекеттік құрылымдарының өкілдерін біріктірді.

Қазақстанның цифрлық даму министрі Жаслан Мәдиев инновациялық экожүйені құруды, стартаптарды дамытуды, цифрлық үкіметті енгізуді және аэроғарыш саласында бірлескен жобаларды қоса алғанда, ынтымақтастықтың негізгі бағыттарын атап өтті. Қазақстан цифрлық технологияларды дамытуда және осы салаға инвестициялар тартуда өз тәжірибесімен бөлісуге дайын.

Табысты ынтымақтастықтың жарқын мысалдарының бірі-моңғол нарығына шыққан қазақстандық Jet электр скутерлерін жалға беру стартапы. Сондай-ақ, моңғол стартаптары халықаралық сарапшылар мен ресурстарға қол жеткізе отырып, қазақстандық Astana Hub технопаркінің акселерациялық бағдарламаларына белсенді қатысады.

Ынтымақтастықтың маңызды бағыты қазақстандық электрондық үкімет жүйесінің EGOV экспорты болып табылады. Моңғолия Қазақстанның мемлекеттік қызметтерді цифрландыру саласындағы тәжірибесін пайдалануға мүдделі, бұл мемлекеттік органдар жұмысының тиімділігін арттыруға және азаматтардың өмір сүру сапасын жақсартуға мүмкіндік береді.

Фото: ҚР ЦДИАӨМ