Қазақстан, 10 шілде 2025 жыл – Караван Инфо ақпараттық агенттігі.Қазақстанда 1395 тірек гидротехникалық құрылыстар (ГТҚ) бар.

Бассейндік инспекциялардың Төтенше жағдайлар департаментімен, жергілікті атқарушы органдармен және «Қазводхоз» РМК-мен бірлесіп жүргізген ағымдағы жылғы тексеру нәтижелері бойынша жөндеуді қажет ететін 560 гидротехникалық құрылыс анықталды, оның 540-ы қанағаттанарлықсыз, 20-сы апатты жағдайда.

Су тасқынына дайындық және су ресурстарын пайдалану тиімділігін арттыру мақсатында жаңғырту және жаңа нысандарды салу бойынша ауқымды жұмыстар жүргізілуде. Бұл туралы ҚР Су ресурстары және ирригация министрлігі хабарлады.

Су ресурстарын басқару жүйесін дамыту тұжырымдамасына сәйкес, 2030 жылдың соңына дейін Қазақстанда 42 жаңа су қоймасын салу және қолданыстағы 37 су қоймасын қайта құру жоспарлануда. Бұл ауыл шаруашылығын тұрақты сумен қамтамасыз етуді қамтамасыз етеді, су басу қаупін айтарлықтай төмендетеді және трансшекаралық суларға тәуелділікті азайтады.

Солтүстік облыстарда жаңа су қоймалары 1,5 млрд м3 тасқын суын жинақтауға септігін тигізіп, 216 елді мекеннің су басуын болдырмайды. Оңтүстікте олар суармалы алқаптарды 295 мың гектарға ұлғайтып, еліміздің ауыл шаруашылығы саласын дамытуға зор үлес қосады.

Сондай-ақ, ағымдағы жылдың соңына дейін 423 мың тұрғыны бар 153 ауылды сапалы ауыз сумен қамтамасыз ететін топтық су құбырларын тарту бойынша 24 жобаның 12-сі аяқталып, тағы 52 елді мекен орталықтандырылған су жүйесіне қосылады.

Сондай-ақ биыл 4 жаңа су қоймасының құрылысы және бұрыннан бар 4 су қоймасын қайта жаңғырту жұмыстары басталады.

Фото: Қазақстан Республикасы Су ресурстары және ирригация министрлігі