Циндао, 2025 жылғы 29 мамыр – Караван ақпарат агенттігі.Қытайдың Циндао қаласында Шанхай ынтымақтастық ұйымына (ШЫҰ) мүше мемлекеттердің электронды сауда жөніндегі Арнайы жұмыс тобының 8-ші отырысы өтті. Іс-шараға Үндістан, Иран, Қазақстан, Қытай, Тәжікстан, Өзбекстан өкілдері, сондай-ақ ШЫҰ хатшылығының ресми өкілдері қатысты. Онлайн форматтағы кездесуге Қырғызстан мен Ресей сарапшылары қосылды.

Кездесуге қатысушылар электрондық коммерция саласындағы ынтымақтастықты нығайту перспективаларын талқылады. Жұмыспен қамтуды ынталандыру және әйелдер кәсіпкерлігін дамытуға жәрдемдесу бойынша озық тәжірибе алмасуға ерекше көңіл бөлінді. Сондай-ақ электронды коммерция саласында аймақтық ынтымақтастықты орнату арқылы шағын және орта бизнесті интеграциялау мәселелері талқыланды.

Кездесу барысында тараптардың бастамасымен электронды сауданы реттеу мен дамытуға бағытталған құжаттар бойынша консультациялар жүргізілді. Сонымен қатар, өңірдегі трансшекаралық электрондық коммерцияны дамытудың әлеуеті мен мүмкіндіктерін көрсеткен «Жібек жолындағы электрондық коммерция» тақырыбындағы презентация өтті.

Іс-шара аясында ресми сессиялардан басқа, электронды коммерцияға мамандандырылған компаниялар арасындағы іскерлік байланыстар ұйымдастырылды.

Фото:ҚР МТИ