Астана, 30 мамыр 2025 жыл – «Караван Инфо» ақпараттық агенттігі.Өткен жылдың қорытындысы бойынша еліміздегі фармацевтикалық өнімдердің қазақстандық өндірісінің көлемі 21,8 пайызға артып, 171,6 миллиард теңгеге жеткен. Бұл туралы Қазақстан-Франция инвестициялық форумында Денсаулық сақтау министрі Ақмарал Әлназарова мәлімдеп, инвестициялық тартымдылықты арттыру және транспарентті нормативтік-құқықтық ортаны құру жөніндегі шаралар кешені салаға тартылған инвестиция көлемін 91,3 миллион долларға дейін ұлғайтуға мүмкіндік бергенін, бұл 2023 жылғы көрсеткіштен екі есе көп екенін атап өтті.

Іс-шараға мемлекеттік органдардың, халықаралық ұйымдардың, жетекші фармацевтикалық компаниялар мен Қазақстан мен Францияның медициналық университеттерінің өкілдері қатысты. Форум барысында Қазақстанның денсаулық сақтау саласындағы инвестициялық саясатының негізгі бағыттары айтылды. 2024 жылы бұл секторға негізгі капиталға салынған инвестиция көлемі рекордтық көрсеткішке 920 миллион долларға жетті, оның 330 миллион доллары жеке инвестиция болды. Қазақстан шетелдік инвесторларды қолдау шараларының кең спектрін ұсынады, соның ішінде салық және кедендік преференциялар, Kazakh Invest арқылы жобаларды қолдау және мемлекеттік қорғау кепілдіктері.

Инвестициялық ахуалды жақсарту мақсатында министрлік ұзақ мерзімді шарттар жасасу тәртібін қайта қарау бойынша жұмыс жүргізуде. Бұл ретте локализация талаптары күшейтіліп, түпнұсқалық препараттардың өндірісі ынталандырылуда, бизнес-қоғамдастықтың ұсыныстарын ескере отырып, нормативтік-құқықтық базаны қайта қарау бойынша белсенді жұмыс жүргізілуде. Келісімшарттық өндіріс аясында халықаралық фармацевтикалық компаниялармен бірлескен жобалар жүзеге асырылуда. Қазақстанда жалпы құны шамамен 30 миллиард теңгені құрайтын төрт түпнұсқа дәрі локализацияланған.

Министр Ақмарал Әлназарова «біз үшін инвестицияның саны ғана емес, ынтымақтастықтың сапасы, тұрақтылығы және инновациялық болуы да маңызды», — деп атап өтті. Ол Қазақстан медициналық инновациялар мен медициналық қызметтер экспортының өңірлік хабына айналуды мақсат етіп отырғанын, ұсыныстарға ашық және барлық деңгейдегі диалогқа дайын екенін айтты.

Фото:Қазақстан Республикасы Денсаулық сақтау министрлігі