Қазақстан, 12 мамыр 2025 жыл – Караван Инфо ақпараттық агенттігі.12-16 мамыр аралығында Қазақстанда ауқымды ақпараттық-білім беру науқаны – Репродуктивті денсаулық апталығы өтуде. Бастамашы Денсаулық сақтау, Білім, Мәдениет және ақпарат министрліктері, жергілікті атқарушы органдар, сондай-ақ халықаралық және үкіметтік емес ұйымдардың белсенді қатысуымен Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия болды.

Бұл жалпыұлттық науқанның басты мақсаты – халықтың репродуктивті денсаулықтың негізгі аспектілері, соның ішінде жұқпалы аурулардың алдын алу, отбасын жауапты жоспарлау және саналы тәрбие мәдениетін дамыту туралы ақпараттандыру. Апталық барысында жастарға, репродуктивті жастағы әйелдер мен ерлерге, сондай-ақ ата-аналар қауымына ерекше назар аударылады.

Бес күн ішінде еліміздің түкпір-түкпірінде азаматтарды ақпараттандыру және кеңес беру мақсатында түрлі шаралар ұйымдастырылады. Атап айтқанда, емханалар мен Жастар денсаулық орталықтарында Ашық есік күндері өткізіліп, кез келген адам білікті мамандардан тегін кеңес ала алады. Сондай-ақ жасөспірімдерге, жастарға және ата-аналарға отбасын жоспарлау, жыныстық жолмен берілетін инфекциялар мен адам папилломавирусының алдын алу мәселелері бойынша дәрістер, семинарлар, шеберлік сабақтары жоспарланған.

Фото:Қазақстан Республикасы Президентінің жанындағы Орталық коммуникациялар қызметі