Исламабад, 10 қыркүйек, 2025 жыл – Караван ақпарат агенттігі.Пәкістанға ресми сапары аясында ҚР Премьер-Министрінің орынбасары – Сыртқы істер министрі Мұрат Нұртілеу Пәкістанның ірі компанияларының басшылығымен кездесіп, экономикалық ынтымақтастық перспективаларын талқылады.

Фауджи қорының бас директоры Анвар Али Хайдермен кездесуде ауыл шаруашылығы, тыңайтқыштар, азық-түлік өнімдері мен құрылыс материалдарын өндірудегі бірлескен жобалардың мүмкіндіктері талқыланды. Тараптар бірлескен жоспарларды жүзеге асыру үшін «Фауджи» қоры мен «Самұрық-Қазына» қоры арасындағы байланыстарды жандандыруға келісті.

Ұлттық логистикалық корпорацияның бас директоры Фаррух Шахзадпен көлік-логистикалық серіктестікті дамыту перспективалары талқыланды. Қазақстандық делегация екі елдің әлеуетін тиімді пайдаланып, өзара жеткізуді арттыратын бірлескен көлік-логистикалық консорциум құруды ұсынды.

TCS Logistics төрағасы Халид Наваз Аван Мұрат Нұртілеумен Қазақстанның инфрақұрылымдық жобаларына қатысу мәселесін талқылады. Министр көлік-логистикалық инфрақұрылымды дамыту Қазақстан үшін стратегиялық басымдық болып табылатынын, оның ішінде Еуразия мен Орталық Азияны Пәкістанмен байланыстыратын және Парсы шығанағы, Африка және Оңтүстік-Шығыс Азия елдеріне шығуға мүмкіндік беретін Ауғанстан арқылы өтетін темір жол құрылысын атап өтті.

Кездесулердің қорытындысы бойынша қазақстандық тарап одан әрі диалогқа және барлық талқыланған бастамаларды жүзеге асыруға дайын екенін білдірді.

Фото:Қазақстан Республикасының СІМ