Тяньцзинь, 2025 жылғы 16 шілде – Караван ақпарат агенттігі.Қытайдың Тяньцзинь қаласында Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Шанхай ынтымақтастық ұйымына (ШЫҰ) мүше мемлекеттердің Сыртқы істер министрлері кеңесінің кезекті отырысына қатысты.

Кездесу барысында министрлер қазіргі халықаралық жағдайда ШЫҰ-ға мүше мемлекеттердің сыртқы саяси үйлестіруін тереңдету мәселелері бойынша пікір алмасты. Сондай-ақ ағымдағы жылдың қыркүйегінде Тяньцзиньде өтетін ШЫҰ-ға мүше мемлекеттер басшыларының саммитіне дайындық мәселелері де талқыланды.

Өз сөзінде ҚР Сыртқы істер министрлігінің басшысы Мұрат Нұртілеу Ұйымның тұрақты даму және ШЫҰ кеңістігін бейбітшілік пен өркендеу аймағына айналдыру игілігі үшін өзара тиімді серіктестікті қалыптастыру әлеуетіне нық сенім білдірді.

«ШЫҰ «Шанхай рухы» қағидаттарына негізделген тең құқылы ынтымақтастықтың бірегей үлгісі бар көпжақты институт ретінде өзінің халықаралық беделі мен тиімділігін нығайта беретініне сенімдімін», — деді Мұрат Нұртілеу.

Сондай-ақ Қазақстанның Сыртқы істер министрі 2024 жылғы шілдеде Астанада өткен ШЫҰ саммитінің қорытындысы бойынша қол жеткізілген уағдаластықтарды жүзеге асырудағы Қытайдың жүйелі көзқарасын қолдайтынын айтып, Ұйым қызметін одан әрі институционалдық дамыту және жетілдіру бойынша дәйекті жұмысты жалғастырудың маңыздылығын атап өтті.

Сапар аясында ШЫҰ-ға мүше мемлекеттердің сыртқы істер органдары басшыларының Қытай Халық Республикасының Төрағасы Си Цзиньпинмен алқалы кездесуі өтті.

Кездесу барысында сенім, теңдік және өзара құрмет рухында диалогты дамытуға және практикалық ынтымақтастықты нығайтуға бейілділік баса айтылды. Қатысушылар аймақтық тұрақтылықты, қауіпсіздікті және тұрақты дамуды қамтамасыз ету мүддесінде көпжақты әріптестікті тереңдетуге баса назар аударатынын растады.

Фото:Қазақстан Республикасының СІМ