Әл-Фараби атындағы Қазақ ұлттық университетінің Басқарма төрағасы – ректоры Жансейіт Түймебаев Бұхара мемлекеттік университетінің ректоры Обиджан Хамидовпен кездесті.

Кездесу барысында тараптар екіжақты серіктестікті сапалық жаңа деңгейге көтеруге бағытталған стратегиялық жол картасына қол қойды.

Бұл құжат бірлескен білім беру бағдарламалары мен ғылыми жобаларды жүзеге асыруға, сондай-ақ академиялық мобильділік аясында студенттер мен оқытушылар арасында өзара тәжірибе алмасуға кең мүмкіндіктер ашады.

Кездесуде Жансейіт Түймебаевтың Бұхара мемлекеттік университетінде Әл-Фараби атындағы ғылыми-білім беру орталығын құру туралы бастамасы маңызды оқиға болды. Бұл орталық ұлы ойшылдың мұрасын насихаттау, түркі халықтарының ортақ ғылыми және рухани құндылықтарын зерттеу және заманауи ғылыми салаларды дамыту үшін бірегей алаңға айналуға бағытталған.

Өз кезегінде ректор Обиджон Хамидов бұл идеяны толық қолдайтынын және ҚазҰУ-мен байланысты тереңдетуге қызығушылық танытатынын білдірді.

Келіссөздер қорытындысы бойынша тараптар ұсынылған барлық ұсыныстарды іске асыру үшін арнайы бірлескен жұмыс тобын құруға келісті.

Дереккөз: Әл-Фараби атындағы Қазақ ұлттық университетінің баспасөз қызметі