«Жазғы Давос – 2025» Дүниежүзілік экономикалық форумының жыл сайынғы отырысы аясында Қырғыз Республикасы Министрлер Кабинетінің Төрағасы Адылбек Қасымалиев Вьетнам Социалистік Республикасының Премьер-Министрі Фам Мин Тиньмен кездесті.

Министрлер кабинетінің басшысы Адылбек Қасымалиев Қырғыз Республикасы Вьетнаммен екіжақты қарым-қатынасты жоғары бағалайтынын және Вьетнаммен сауда-экономикалық ынтымақтастықты жандандыруға мүдделі екенін атап өтті.

Өз кезегінде Вьетнам Премьер-Министрі Фам Мин Тинь екіжақты ынтымақтастықты кеңейтуге қызығушылық танытып, Вьетнам Қырғыз Республикасын Орталық Азиядағы сенімді серіктес ретінде қарастыратынын баса айтты.

Ол бұрын қол жеткізілген уағдаластықтарды жүзеге асыруға және басым бағыттар бойынша практикалық ынтымақтастықты дамытуға ықпал етуге дайын екенін білдірді.

Әңгімелесу барысында тараптар қырғыз-вьетнам ынтымақтастығының кең ауқымды мәселелерін талқылап, сауда-экономикалық байланыстарды, инвестициялық әріптестік пен саяси диалогты нығайтуға ерекше көңіл бөлді.

Екі елдің үкімет басшылары жақын арада экономикалық саладағы бірқатар екіжақты құжаттарға, оның ішінде сауда-экономикалық ынтымақтастық жөніндегі үкіметаралық комиссия құру туралы келісімге және қосарланған салық салуды болдырмау туралы келісімге қол қою мақсатында тараптардың қарауын жеделдетуге келісті.

Кездесу қорытындысы бойынша тараптар қырғыз-вьетнам қарым-қатынастарын одан әрі тереңдетуге ниетті екенін растады.