Астана, 2026 жылғы 10 наурыз – Karavan Info жаңалықтар агенттігі . Сәтбаев университеті қоршаған ортадағы механикалық тербелістерді электр энергиясына айналдыра алатын ықшам құрылғыны жасап шығаруда. Жоба шалғай және жету қиын аудандарда автономды сенсорларды тұрақты электрмен жабдықтауды қамтамасыз етуге бағытталған.

Технология электромагниттік индукция принципіне негізделген: құрылғы ішіндегі катушкалар мен магниттердің қозғалысы электр тогын тудырады. Құрылғы ең көп таралған табиғи тербелістер диапазонында — ондағаннан бірнеше жүз герцке дейін — жұмыс істеуге арналған. Бұл оны ауыл шаруашылығында, қоршаған ортаны бақылауда және өнеркәсіпте қолданылатын IoT сенсорларын қуаттандыру үшін тиімді пайдалануға мүмкіндік береді.

Жоба менеджері Албанбай Нұртай атап өткендей, жаңа әзірлеме сенсорлардың дәстүрлі энергия көздерінсіз үздіксіз жұмыс істеуін қамтамасыз етеді.

Жұмыс кезең-кезеңімен жүзеге асырылуда: схемалық және 3D моделін жасаудан бастап прототиптерді өндіруге және оларды сынауға дейін. Ғалымдар болашақта технологияны патенттеуді жоспарлап отыр. Жоба жасыл энергия мен энергия үнемдейтін шешімдерді әзірлеуге қосылған үлес ретінде қарастырылады.

Фото: Қаныш Сәтпаев атындағы университет