2025 жылдың 12 қазанынан бастап ЕО елдері электронды кіру/шығу жүйесін (EES) кезең-кезеңімен енгізе бастайды. Толық іске қосу 2026 жылдың 10 сәуіріне жоспарланған, осы уақытқа дейін жүйе ЕО-ның барлық шекаралық пункттерінде жұмыс істеуі керек.

12 қазаннан бастап не өзгереді

Бірінші кезеңде ЕО-ға қысқа мерзімді визамен келетін шетелдіктерден биометриялық деректер – саусақ ізі мен бет бейнесі жиналады. Бұл процедуралар бірте-бірте және, мүмкін, таңдамалы түрде енгізіледі. Шекара өткелдеріндегі төлқұжаттардағы мөрлер әлі де қойылады.

10 сәуірден кейін не болады

Іске асыру кестеге сай болса, 2026 жылдың сәуір айынан бастап мобильді қосымша немесе әуежайлардағы арнайы терминалдар арқылы ЕО-ға кіру үшін тіркелу міндетті болады. Бұл қысқа мерзімді виза иелеріне қатысты болады.

Жүйе неліктен енгізілуде?

EES жүйесі кіру және шығу күндерін автоматты түрде жазып алады, Шенген аймағында болу ұзақтығын бақылауға көмектеседі және төлқұжаттық бақылауды жылдамдатады. Биометриялық деректер кірген кезде тапсырылғаннан кейін, биометриялық төлқұжаты бар жолаушылар келесі жолы шекарадан тезірек өте алады – егер өткізу пунктінде тиісті жабдық болса, автоматты түрде.

Маңызды мәліметтер

• Биометриялық емес төлқұжатпен кіру әлі де мүмкін, бірақ биометриялық паспортты алдын ала алған жөн.

• Болашақта ЕО электронды Шенген визаларына көшуі мүмкін.

• EES іске қосу бастапқыда 2023 жылға жоспарланған болатын, бірақ кейін бірқатар елдердің техникалық дайын болмауына байланысты кейінге қалдырылды.

EES жүйесі ЕО-ға визамен кіретін үшінші елдің азаматтарына арналған. Сонымен қатар, 2026 жылға қарай визасыз елдердің азаматтары үшін ETIAS осыған ұқсас жүйені іске қосу жоспарлануда.

31.07.2025 14:49:54