Ереванда Конституциялық соттардың заңның үстемдігі мен адам құқықтарын қорғаудағы рөліне арналған жоғары деңгейдегі халықаралық конференция өтті. Іс-шараға түрлі елдердің конституциялық соттарының өкілдері, Венеция комиссиясының сарапшылары және халықаралық заңгерлер қатысты.

Конференцияға қатысушылар конституциялық соттар шешімдерінің құқықтық мемлекетті нығайту және азаматтардың құқықтарын қорғау үшін маңыздылығын талқылады. Конституциялық бақылауда заң үстемдігінің әртүрлі критерийлерін қолдану, сондай-ақ осы саладағы халықаралық стандарттардың рөлі мәселелері қозғалды.

Қазақстан Республикасы Конституциялық Сотының судьясы Айгүл Қыдырбаева Конституциялық бақылауда  құқық үстемдігі критерийлерін қолданудағы Қазақстанның тәжірибесімен бөлісті. Оның сөз сөйлеуі конференцияға қатысушылардың үлкен қызығушылығын тудырды.

Фото: ҚР Конституциялық соты