Нұрафшан қаласында Өзбекстан халқының Екінші дүниежүзілік соғыс кезіндегі және ел тәуелсіздігі жылдарындағы ерлігі мен қаһармандығын мәңгі есте қалдыруға арналған «Ватанпарвар» (Патриот) саябағының салтанатты ашылуы өтті. Ташкент облысы Ішкі істер Бас басқармасының баспасөз қызметінің жетекшісі Бобур Туляғановтың айтуынша, 1,5 гектар аумақты алып жатқан саябақ – құрылысшылар, инженерлер, дизайнерлер, сәулетшілер, тарихшылар, археологтар мен мұрағатшылардан құралған тұтас бір ұжымның тынымсыз еңбегінің жемісі.

«Ватанпарвар» кешенінде Екінші дүниежүзілік соғысқа қатысқан жауынгерлердің ерліктері ғана емес, сонымен бірге тәуелсіздік жылдарында Отанымыздың тыныштығы мен қауіпсіздігін қорғап, қауіп-қатер мен қарулы шабуылдарға тойтарыс берген жауынгерлердің ерлігі де көрініс тапқан. Саябақты жасаушылар жай ғана мемориал емес, патриотизмнің жанды нышаны, әсіресе өскелең ұрпаққа үлгі-өнеге болатындай орын жасауға ұмтылды.

Саябақтың құрылысы рекордтық мерзімде аяқталды. Барлық жобаға қатысушылардың үйлесімді жұмысы мен адалдығы арқасында Нұрафшан тұрғындары мен қонақтары отаншылдық пен қаһармандық рухымен сусындаған осы бірегей орынға енді келе алады.

Болашақта саябақ пен оның аумағында орналасқан мұражай тек серуендеп, демалатын орын ғана емес, өскелең ұрпақты өз елінің тарихымен, батырларының ерліктерімен таныстыратын киелі зиярат орнына, патриоттық тәрбие орталығына айналады деп күтілуде. «Ватанпарвар» кешені болашақ Отан қорғаушылар тәрбиеленетін патриотизм мектебіне айналады.