SOR29 халықаралық Климаттық конференциясының аясында Каспий теңізінің деңгейін төмендету мәселесіне арналған арнайы отырыс өтті. Іс-шараға барлық Каспий маңы мемлекеттерінің, сондай-ақ халықаралық ұйымдардың өкілдері қатысты.

Отырысқа қатысушылар өңірдің экологиясына және жағалау мемлекеттерінің экономикасына елеулі теріс әсер ететін Каспий теңізі деңгейінің төмендеуіне қатты алаңдаушылық білдірді. Бұл мәселені тиімді шешу үшін барлық Каспий маңы елдерінің күш-жігерін біріктіру қажеттігі атап өтілді.

Талқылау барысында теңіз деңгейінің мониторингі, бірлескен ғылыми зерттеулер жүргізу және климаттың өзгеруіне бейімделу жөніндегі шараларды әзірлеу саласындағы өңірлік ынтымақтастықты нығайту жөнінде ұсыныстар айтылды. Қазақстандық тарап теңіз деңгейіне жүйелі мониторинг жүргізу тетігін құруды және өзгерістерді болжау және бейімделудің тиімді шараларын әзірлеу үшін бірлескен ғылыми зерттеулер жүргізуді ұсынды. Әзірбайжан тарапы теңіз деңгейінің төмендеу себептерін зерттеу үшін сараптамалық топ құру туралы бастама көтерді.

Отырыс қорытындысы бойынша декларация қабылданды, онда қатысушылардың негізгі уағдаластықтары көрсетілген.

Фото: ҚР Экология және табиғи ресурстар министрлігі