Әңгіме барысында Шавкат Мирзиёев Қасым-Жомарт Тоқаевты Қазақстан Республикасының жаңа Конституциясының жобасы бойынша референдумның сәтті өтуімен құттықтады.

Өзбекстан Президенті атап өткендей, референдум нәтижелері Президент Қасым-Жомарт Тоқаевтың басшылығымен жүргізіліп жатқан ауқымды реформалардың халықтың сеніміне ие екенін айқын көрсетеді.

Мемлекет басшысы Шавкат Мирзиёевке қолдау көрсеткені және Өзбекстаннан, соның ішінде халықаралық ұйымдар құрамында бақылаушылар миссиясын жібергені үшін алғыс айтты.

Қасым-Жомарт Тоқаев мәлімдегендей, жаңа Конституция прогрессивті, заман талабына сай және мемлекеттің тұрақты және жан-жақты дамуын қамтамасыз етуге бағытталған. Ол реформа процесінде халықаралық серіктестермен, әсіресе Қазақстанның ең жақын көршілері мен одақтастарымен ынтымақтастықты нығайтуға ерекше назар аударылатынын қосты.

Әңгімелесушілер сондай-ақ стратегиялық серіктестік пен одақтастық рухында тұрақты түрде нығайып келе жатқан Қазақстан-Өзбекстан қарым-қатынастарының оң динамикасын атап өтті.

Тараптар бұрын қол жеткізілген келісімдер мен Жоғарғы Мемлекетаралық Кеңестің шешімдерін орындаудағы ілгерілеушілікке қанағаттанушылық білдірді. Барлық деңгейдегі ынтымақтастықты жалғастыру туралы келісімге қол жеткізілді.

Президенттер өзекті аймақтық және халықаралық мәселелер бойынша пікір алмасып, алдағы байланыстар кестесін қарастырды.

Дереккөз: ХАБАР Ақпарат агенттігі