Оппозициялық либерал Тобуро демократиялық партиясының кандидаты Ли Чжэ Мён Оңтүстік Кореядағы кезектен тыс президенттік сайлауда 49,2 пайыз дауыс жинап, жеңіске жетті, деп хабарлады Сеулдегі Ұлттық сайлау комиссиясы сәрсенбі, 4 маусым күні жергілікті уақыт бойынша бюллетеньдердің 96,74 пайызын санағаннан кейін.

Оның консервативті Халықтық билік партиясынан басты қарсыласы Ким Мун Су сайлаушылардың 41,4 пайызының қолдауына ие болып, жеңілгенін мойындады.

«Мен халықтың шешімін кішіпейілділікпен қабылдаймын», — деді ол журналистерге және жеңіске жеткен кандидатты құттықтады.

Ұлттық сайлау комиссиясы дауыс беру нәтижелерін растаған бойда Ли Чжэ Мён президенттік қызметке кіріседі. Мүмкін, бұл 4 маусым күні таңертең болады, деп хабарлайды AFP. Оңтүстік Кореядағы 21-ші президенттік сайлауға сайлаушылардың қатысуы 79,4 пайызды құрады, бұл 1997 жылдан бергі ең жоғары көрсеткіш.