Қазақстанның Ресейдегі Елшісі Дәурен Абаев Ресей Федерациясы Қарулы Күштерінің Орталық мұражайында Екінші дүниежүзілік соғыстағы жеңіске қосқан үлесіне арналған көрмені аралап көрді. Мұражайда сондай-ақ аты аңызға айналған Жеңіс Туы орналасқан.

Елші атап өткендей, жерлесіміз Рақымжан Қошқарбаев Рейхстаг ғимаратына туды алғашқылардың бірі болып тіккен.

Өз кезегінде мұражай директоры Александр Никонов Қошқарбаевтың ерлігіне қатысты фотосуреттер мен құжаттарды ұсынды.

Соғыс естелігін сақтаудың және жас ұрпақты оның батырлық тарихына құрмет рухында тәрбиелеудің маңыздылығы атап өтілді. Екіжақты байланыстарды дамыту және бірлескен жобалар мен іс-шараларды жүзеге асыру мәселелері де талқыланды.

Соңында А. Никоновқа Кеңес Одағының Батыры, армия генералы Сағадат Нұрмағамбетовтің 100 жылдығына орай кеуде белгісі табысталды.

Ресей Федерациясы Қарулы Күштерінің Орталық мұражайы — ғасырлық тарихы бар әлемдегі ең ірі әскери тарих мұражайларының бірі. Көрмеде әртүрлі техника мен қару-жарақтың үлгілері, әскери киімдер жиынтығы, құжаттар, марапаттар, қару-жарақтар және сарбаздар мен әскери басшылардың жеке заттары қойылған.

Дереккөз: Ресей Федерациясындағы Қазақстан Республикасының Елшілігі