Астана, 2026 жылғы 23 ақпан – Karavan Info ақпараттық агенттігі . ҚР Сыртқы істер министрінің бірінші орынбасары Ержан Ашықбаев Біріккен Ұлттар Ұйымының Балалар қорының (ЮНИСЕФ) Қазақстандағы өкілі Рашед Сарвармен кездесті. Тараптар балалардың денсаулығын қорғау, инклюзивті білім беруді дамыту, балаларды зорлық-зомбылықтан қорғау, цифрлық қауіпсіздік және әлеуметтік қорғау жүйелерін нығайту бағдарламаларын іске асыру мәселелерін талқылады.

Ержан Ашықбаев ЮНИСЕФ-тің халықаралық озық тәжірибелерді енгізу және балалар құқықтарын қорғау әдіснамасы мен мониторингін жетілдіру жөніндегі күш-жігерін жоғары бағалады. Ол «Қазақстан балалары» ұлттық бағдарламасын әзірлеудегі сараптамалық қолдауы және 2025 жылдың қарашасында Қазақстанның Балаларға қатысты зорлық-зомбылықты тоқтату жөніндегі жаһандық альянсқа қосылуына ықпал еткені үшін алғысын білдірді.

ЮНИСЕФ өкілі 2026-2030 жылдарға арналған жаңа ынтымақтастық бағдарламасы ұлттық стратегиялық құжаттардың басымдықтарына және БҰҰ Бала құқықтары жөніндегі комитетінің ұсынымдарына сәйкес келетінін атап өтті.

Тараптар серіктестікті нығайтуға және биыл ЮНИСЕФ-тің 80 жылдық мерейтойына арналған бірлескен іс-шаралар өткізуге келісті.

Фото : Қазақстан Республикасы Сыртқы істер министрлігі