Халықаралық орыс тілі ұйымының штаб-пәтері Сочиде орналасады. Жаңа ұйым орыс тілін насихаттау және елдер арасындағы ынтымақтастықты нығайту үшін құрылып отыр, бірақ ол тек ТМД-мен шектелмейді — барлық мүдделі мемлекеттер қосыла алады.

Тәуелсіз Мемлекеттер Достастығының Бас хатшысы Сергей Лебедев мүше елдер үшін маңызды біріктіруші жобаға айналатын ұйымның іске қосылатынын жариялады. Ол Халықаралық орыс тілі ұйымының жұмысы тілдің мәртебесін арттыруға және халықтар арасындағы достықты нығайтуға ықпал ететінін атап өтті.

Қазіргі уақытта негізін қалаушы елдер — Ресей, Беларусь, Қазақстан, Қырғызстан, Тәжікстан және Өзбекстан — ұйымдастырушылық және техникалық мәселелерді шешуде. Тұрақты хатшылық құрылғанға дейін оның функцияларын Ресей Сыртқы істер министрлігі орындайды. Ұйымның ең жоғары органы Министрлер конференциясы болады, оған негізін қалаушы мемлекеттердің тиісті ведомстволарының басшылары кіреді.

Ұйымды құру бастамасы Қазақстан Президенті Қасым-Жомарт Тоқаевқа тиесілі (2022 ж.), ал оны құру туралы келісімге ТМД мемлекет басшылары 2023 жылдың 13 қазанында Бішкекте қол қойды. Ресей Президенті Владимир Путин штаб-пәтерін Сочиде орналастыруды ұсынып, жаңа құрылымның тез арада іске қосылуына үміт білдірді.

Естеріңізге сала кетейік, кеше, 2026 жылдың 19 қаңтарында, Тәуелсіз Мемлекеттер Достастығының туы мен елтаңбасының ресми түрде қабылданғанына 30 жыл толды. Соңғы үш онжылдықта бұл рәміздер ТМД-ның барлық іс-шараларының ажырамас бөлігіне және мемлекетаралық ынтымақтастықтың танымал белгісіне айналды.