Қырғыз Республикасы Жогорку Кенешінің Төрағасы Нұрланбек Тұрғынбек уулу Португалияға жұмыс сапары аясында Порту қаласында орналасқан футбол стадионында болды.

Бұл спорт нысаны 2001 жылы салынып, 2004 жылы өткен Еуропа чемпионаты үшін 2003 жылы ашылған. 52 мың адам сыятын стадионның құрылысына 100 миллион еуроға жуық қаржы жұмсалған. «Драгао» деп аталатын спорт ғимаратында Еуропа чемпионаты, ұлттық лиганың финалы және 2021 жылы «Манчестер Сити» мен «Челси» арасындағы финалдық матчтар сияқты көптеген халықаралық жарыстар өтті. Сондай-ақ 2003 жылы Порту клубы бас бапкер Жозе Моуриньоның жетекшілігімен Еуропа футбол қауымдастығы одағы (УЕФА) мен Португалия Суперлигасының негізгі ойындарында жеңіске жеткенін де айта кеткен жөн.

Футболшылар мен жанкүйерлерге жасалған жағдаймен танысып, стадион басшылығымен кездескен Нұрланбек Тұрғынбек ұлы соңғы жылдары Қырғызстанда да спорттың бұл түрін дамытуға ерекше көңіл бөлініп жатқанын атап өтті.

"Сондықтан да Португалия тәжірибесі біз үшін өте маңызды. Қазіргі уақытта Бішкек қаласында 50 мыңнан астам адамға есептелген Орталық Азиядағы ең үлкен футбол стадионы салынып жатыр. Ол пайдалануға берілгеннен кейін республикалық қана емес, халықаралық жарыстарды да жоғары деңгейде ұйымдастыруға жағдай жасалады", — деді Төраға.

Сонымен бірге ол Португалия өзінің ең жақсы футболшыларымен де танымал екенін қосты.

"Футбол жай ойын емес. Бүгінгі жаһандық жағдайда бұл достық пен мемлекетаралық байланысты нығайтып отырған дипломатиялық мүмкіндіктердің бірі. Осыған сәйкес, біздің екі ел де осы саладағы ынтымақтастыққа басымдық беруі қажет. Әсіресе, қырғыз футболшылары әлемге әйгілі португалдық футболшылардың тәжірибесі мен ойын әдістерін үйренуге қызығушылық танытуда", — деді Нұрланбек Тұрғынбек ұлы.

Осымен Төрағаның Португалияға жұмыс сапары аяқталып, бүгін, 3 шілдеде Бішкекке оралғанын айта кетейік. Нұрланбек Тұрғынбек ұлы осы елге Еуропадағы қауіпсіздік және ынтымақтастық ұйымы Парламенттік Ассамблеясының (ЕҚЫҰ ПА) кезекті отырыстарына қатысу үшін келді.