Өзбекстандын президенти Шавкат Мирзиёев Фергана облусуна болгон иш сапарынын алкагында жаңы өнөр жай объектилеринин курулушунун ишке киргизүү аземине катышты.

Ал өз сөзүндө акыркы беш жылда Ферганада өнөр жайдын көлөмү 1,3 эсеге, ал эми экспорт дээрлик эки эсеге өсүп, 722 миллион долларга жеткендигин белгиледи.

Инвестициялар да жыл сайын өсүүдө. 2023-жылы 1,3 миллиард доллар инвестициялык каражаттар тартылып, чет элдик капиталдын катышуусунда ишканалардын саны 470ке жеткен.

Мындан тышкары жалпы суммасы 6 миллиард долларлык чет элдик инвестициялык 110 долбоор жана 1,1 миллиард долларлык жергиликтүү 22 долбоор ишке ашырылууда.

«Буга чейин облуста алты долбоорду да ишке ашыруу кыйынчылык жаратчу. Бүгүнкү күндө 6 миллиард долларлык долбоорлор тууралуу сөз болуп жатат. Неге? Биз өстүрдүк, өнүктүрдүк, инвесторлорду ынандырдык, шарттарды түздүк. Биз бул ишти улантабыз», — деди Шавкат Мирзиёев.

«Кокон» эркин экономикалык аймагында 370 миллион долларлык жүзгө жакын долбоор ишке ашырылып, 9 миң жаңы жумуш орундары түзүлдү. 2024-жылдын биринчи жарымында 1,5 триллион сомдук продукция өндүрүлүп, 60 миллион доллар экспорттолгон.

Мындан тышкары, бул өнөр жай аймагын Кувасай шаарын бойлой 210 ​​гектарга кеңейтүү пландалууда. Анда  жалпы суммасы 1 миллиард доллар болгон 185 долбоорду ишке ашырып, 12 миң жумушчу орун түзөрү күтүлүүдө. Кокондо 230 гектар аянтты ээлеген өзбек-кытай атайын өнөр жай аймагы түзүлөт.

Сүрөт: Өзбекстан Республикасынын Президентинин басма сөз кызматы